Te Kaieke Tohora (Whale Rider)

Whakamiharo ana tera te tirohanga atu ki a ia, ki te kaieke tohora. I rere atu te wai i a ia, ka hamama tona waha kia taea ai te hau makariri te kupa iho. Ko ana karu e kohara ana i te ahurei. Korekoreko katoa ana te tinana i te rehu taimana. I runga i taua taniwha ano nei he tekoteko paku kua whakairotia, e tino haura ana, e koratarata ana, e tu torotika ana. Ano nei na tona tino kaha, e to ake ana ia i te tohora ki te rangi . . . Ko Kahutia-te-rangi te kaieke tohora, te tipuna o nga iwi o Te Tai Rawhiti. I haere mai ia i Hawaiki, te kainga o nga Tawhito, ki te tai rawhiti o Aotearoa. No muri mai ko Kahu, te matamua o nga mokopuna tuarua a te whanau. I arohaina ia e ona whanaunga katoa engari ko tera i tino pirangi ia kia aroha atu, kaore i aroha atu - ara, ko tona tipuna tane tuarua. Kua rongo au i a Kui Putiputi e tiwe ana i te hau, 'E Kahu!' I te toia iho au e oku putu. Me tu rawa au ka wetewete. I moumou noa iho te wa ki tenei mahi engari he pai ake tera i te toromi. Riro atu ana nga putu i nga au pioi. Ka titiro ake au. I te kimi au i hea ke ra a Kahu. I hikitia ake au e nga ngaru ka tuku iho ano. Ka tiwaha atu au, 'E Kahu, kaua.' Kua tae ke atu ia ki te tohora, a, e pupuri ana i te kauwae. Mama noa iho te huri mai i te ao purakau ki te ao tuturu, mai i te whakatangi ki te whakakata. Ko tenei pukapuka ko Te Kaieke Tohora ka whakamanaru i te kaipanui ahakoa pehea te pakeke.